A ANPA encárgase da xestión dunha serie de servizos fundamentais para o funcionamento do centro, o benestar do alumnado e a conciliación das familias, coma o comedor ou as actividades extraescolares. Tamén facemos festas! Pero, ademais, traballamos e pelexamos polo correcto mantemento das instalacións do centro, algo imprescindible para garantir a seguridade e o benestar dos peques.

Outra das nosas vitorias foi a reparación do chan do comedor, que levaba moito tempo con buracos que implicaban un risco de caídas para todas as persoas que utilizan as instalacións todos os días.

Igualmente, coas xuntanzas cos representantes municipais conseguimos que se instalasen nos baños dispensadores de xabón e de papel hixiénico. Así mesmo, nos baños arranxáronse os azulexos, que estaban caendo ao chan, o que supoñía un perigo claro para a saúde dos nosos fillos e fillas.

O traballo da ANPA dá os seus froitos. Cantos máis sexamos, máis cousas conseguiremos para ter un cole mellor para os nosos peques!